Í dag vöknuðum við snemma og vorum mætt út á dekk þegar skipið lagðist fyrir akkerum við Coco Cay. Síðan fórum við í morgunmat en tókum svo bát yfir á eyjuna. Eyjan er nú ekki mjög stór, svona eins og 3-4 Gróttur en hefur upp á margt að bjóða. Við höfðum ákveðið að sigla á kajökum og snorkla og áttum kajaktíma klukkan 11. Áður fórum við á strámarkaðinn og kíktum á varninginn hjá eyjaskeggjunum. Við vorum mætt tímanlega fyrir kajakróðurinn og undirrituðum skjal sem firrir skipafélagið allri ábyrgð á hugsanlegum skakkaföllum. Síðan fundum við björgunarvesti og festum þau á okkur og biðum eftir að vera kölluð í róðurinn. Eftir smá leiðbeiningar var haldið af stað og róið í átt til hafs. Mjög fljótlega stoppaði fararstjórinn og sýndi okkur kuðung með krabba, krossfisk og benti okkur á að við gætum séð skötur sem við sáum þó ekki í róðrinum. Eftir að hafa róið í 1½ klukkutíma gengum við frá kajaknum, árum og vestum og héldum í hádegismat. Hann var borðaður á Captein Blackbirds, sem er grillstaður á eyjunni og gátum við valið um hamborgara, pylsur, kjúkling, rif og fleira góðmeti. Þegar við höfðum lokið við að matast héldum við í átt að snorklinu. Eftir að hafa fengið snorklgræjur sem samanstanda af munnstykkjum, gleraugum, froskalöppum og björgunarvestum, var okkur ekki til setunnar boðið. Við héldum niður á strönd og út á haf, syntum í átt að flugvélaflaki og þaðan að bátsflaki og nutum þess að sjá það sem fyrir augun bar. Við sáum fullt af alls kyns fögrum fiskum og þar komum við auga á skötu sem læddist eftir hafsbotninum. Við snorkluðum í u.þ.b. 1½ klukkutíma en þá var tími til komin að halda til skips. Hér erum við nú að ganga frá síðustu færslu í siglingunni en í kvöld er ætlunin að fara á sýningu í leikhúsinu, pakka niður og ganga frá töskunum, því þær verða að vera komnar fram fyrir miðnætti. Við eigum svo að fara frá borði um klukkan 9:15 en við erum með bleikan aðgang frá borði. Þess má geta að við höfum skipt um húðlit, úr hvítu (Þorvaldur úr næpuhvítu) í eldrautt 🙁

Dvölin hér á skipinu Sovereign of the Seas er búin að vera alveg frábær eins og við mátti búast. Við komum í skipið um kl. 14:30 í gær og eftir að hafa bókað okkur inn, keyptum við okkur inn í sódaklúbbinn á skipinu og fórum svo og fundum herbergið okkar sem er númer 7548. Það var aðeins minna en við áttum von á frá fyrri siglingu en það kemur sko ekki að sök því við erum hér eingöngu til að sofa, fara í sturtu og skipta um föt. Um 16:15 var svo skyldu björgunaræfing, þar sem allir áttu að vera í vestum og mæta á fyrirfram ákveðinn stað og gefa sig fram. Við mættum á svæði 12 og þetta tók u.þ.b. 20 mínútur. Síðan var siglt úr höfn á vit ævintýranna. Kvöldmaturinn var klukkan 6 og við erum á 10 manna borði, með hjónum og þremur mæðgum. Eftir að hafa borðað í gærkvöldi sinntum við smá viðskiptum og fórum svo í koju, þreytt og ánægð. Í morgun var vaknað og hinn frægi Windjammer heimsóttur en það er aðal orkulind skipsins. Við slöppuðum síðan af þar til við komum í höfn í Nassau á hádegi. Við löbbuðum síðan um miðbæinn í 33 hita og miklum raka. Við fórum svo í skipið til að skipta um skó og fá okkur eitthvað að drekka, til að bæta upp vökvatapið. Við áttum síðan stefnumót um 17:30 en þá vorum við sótt af fararstjóra til að fara á Segway. Sú ferð var alveg peningana virði og við erum að spá í hvort við eigum að hætta við að fara í siglingar og kaupa okkur eins og eitt Segway. Slíkur fararskjóti kostar u.þ.b. 6000 dollara, ekki alveg gefið enn alveg frábær ferðamáti. Við eyddum næstum því tveimur tímum í að ferðast um í kringum Charlotte virkið og í Botanical garðinum sem er eingöngu opin fyrir sérstaka hópa og Segway ferðalanga. Við komum heim sveitt og sæl, fórum í sturtu og á Windjammer, því við höfðum misst af formlega kvöldverðinum, æææ 🙁 Nú erum við að leggja síðustu hönd á færsluna, svo að hægt sé að lesa um hvað við erum að upplifa ótrúlega skemmtilega hluti 😉

Jæja nú er bara komið að siglingunni frægu 🙂 Við erum að ganga frá síðustu endunum áður en við leggjum í hann út að Port Canaveral. Skrifa síðustu færsluna í góðu tölvusambandi, pakka og svona það sem þarf að gera en við verðum nú aftur hér á mánudaginn. Gærkvöldið var æðislegt, sirkusinn stóð alveg fyrir sínu, ofboðslegur munur að sjá þetta svona life. Þetta eru aldeilis færir listamenn upp til hópa og maður sá að það mætti ekki skeika sekúndu að allt færi í steik, sérstaklega hjá loftfimleikafólkinu. Þarna voru trúðar, loftfimleikar, hjólagaurar og aðrir í stórum hringjum sem þeir snérust um sviðið (þeir voru inn í hringjunum), svo voru litlar stelpur með stór kefli sem þær sneru á bandi með prikum á sinn hvorum endanum. Hópur var með listir á trampólínum ótrúlega skemmtilegt allt saman og svo var líka life tónlist. Áður en við fórum á sýninguna gengum við um Downtown Disney m.a. í ausandi rigningu svo að við fjárfestum í regnhlíf, við klikkum alltaf á því að taka með okkur regnhlíf að heiman. Við getum farið að stunda regnhlífaleigu heima, við eigum orðið svo margar 😉 Jæja nú líður tíminn hratt á gervihnattaöld og mál að fara hætta hér, við setjum inn nokkrar myndir sem við höfum tekið m.a. í gærkvöldi.