Nú er bara komið að heimferðardegi, við hefðum nú alveg verið til í að vera nokkra daga hér í sveitinni því að húsið sem við erum í er í raun út í sveit. Æðislegur staður en pínu langt frá öllu sem við höfum verið að sækja en við höfum látið okkur hafa það. Í gær vorum við boðin til vina okkar hér í Flórída í þakkagjörðarmáltíð og við ókum sem leið lá til Safety Harbor sem liggur við Tampaflóann. Þegar komið var á staðinn var öll fjölskylda Chris og Allen mætt en við höfðum bara hitt þau og soninn Patrik áður. Gummi og Edda voru að hitta þau öll í fyrsta skipti og þau fögnuðu okkur eins og við hefðum þekkt þau alla ævi en svona er þetta nú bara hér í Ameríkunni 🙂 Þetta var sko kalkúnaveisla í lagi með öllu tilheyrandi og ekki skemmdi að Cameron tengdasonur Chris og Allen átti 30 ára afmæli. Við fengum að syngja afmælissöng fyrir hann á ensku og íslensku. Gróa Mjöll lék sér svo við dætur hans og Lindsey 2 og 4 ára sem og þrjá hunda og ekki skemmdi það nú fyrir. Þetta var bara skemmtilegt og alltaf gaman að hitta þau. Í dag er svo bara að pakka dótinu sínu og fara og eyða nokkrum klukkutímum áður en við förum út á flugvöll til að fara heim í kuldan og venjulegu tilveruna. Við eigum fullt af góðum minningum og gerðum fullt af skemmtilegum hlutum og nú er bara að plana næstu ferð 😉

Continue reading →

Jæja nú er þessi hluti afmælisferðarinnar á enda, við förum í land í fyrramálið. Við erum búin að pakka og setja töskurnar fram á gang svo að þær séu færðar frá borði og við sótt þær í komusalnum. Tveir síðustu dagar hafa farið í afslappelsi, sólböð, át, hreyfingu og leikhússýningar. Gróa Mjöll hefur verið dugleg að fara í klúbbinn sinn og talar ensku eins og innfæddur, það er búið að vera virkilega gaman að fylgjast með henni hvað hún skemmtir sér vel. Þessi tími hér um borð hefur verið æðislegur, við höfum getað nýtt okkur það sem boðið er upp á, þó sumir hafi verið duglegri við það en aðrir 😉 Veðrið hefur leikið við okkur alla ferðina sól og hiti, stundum hefur verið helst til of heitt en við kvörtum ekki.  Stundum hafi verið meiri veltingur en það hefur ekki skemmt fyrir neinum, bara yndislegt bara að láta rugga sig í svefn 🙂 Hér á eftir koma nokkrar myndir sem teknar hafa verið hér á skipinu.

Continue reading →

Í morgun um kl. 8 héldum við í leikhúsið þar sem að safnast var saman fyrir skoðunarferð dagsins. Við ætluðum að fara í fiðrildabúgarð og fleira. Við ókum í rútu yfir á franska hluta eyjunnar en hún skiptist í franskt og hollenskt yfirráðasvæði. Það var mjög gaman að skoða fiðrildin sem voru alveg frá lirfum í púpum yfir í alla vega lit fiðrildi. Gróa Mjöll fékk eitt stórt á höfuðið og það sat þar lengi og var svo fært aftan á bakið á henni og leit þá út eins og vængir, sjá myndir. Eftir að hafa eytt tíma þarna var förinni heitið áfram til Margot sem er stærsti bær franska hlutans og fengum við tíma til að sinna smá viðskiptum. Etir það héldum við aftur yfir í hollenska hlutann nánar til tekið í höfuðstaðinn Philipsburg þar sem skipið okkar Serenade of the Seas lá við bryggju. Við kíktum aðeins í búðir og fengum hlekkinn okkar í armbandið sem við erum búnar að vera safna á í Diamonds International. Við tókum síðan Water Taxi yfir á bryggjuna þar sem skipið var. Haldið var upp á Windjammer að fá sér í gogginn eftir 5 tíma í landi og voru allir mjög svangir. Nú er bara afslöppunartími og tími til að setja inn færslu og myndir áður en kvöldmatur og skemmtun í leikhúsinu hefjast. Nú eru tveir heilir dagar um borð í skipinu áður en við förum endanlega í land. Sá tími verður notaður til að fara í ræktina, hvíla sig og njóta sólarinnar 😉

Continue reading →