Veðrið búið að leika við okkur í dag, vöknuðum frekar snemma miðað við laugardag, við það að turtildúfurnar úr Skipholtinu komu að kíkja á tjaldið. Gummi hafði ekki séð herlegheitin og þurfti að leggja blessun sína yfir gripinn áður en haldið verður af stað í ferðalagið. Þegar búið var að nudda stýrurnar úr augunum og bursta tennurnar, fórum við svo í Kópavoginn að skila slátturgræjunum, með viðkomu í Sorpu til að henda rusli. Síðan var farið í Bónus til að fylla á birgðir heimilisins o.fl. Við sóttum tengdamömmu á Grundina upp úr hádegi en hún beið spennt eftir okkur. Við sátum svo í kjallaranum og létum sólina steikja okkur eða hlýja allt eftir hvernig á það sé litið, það sem eftir lifði dags. Hlustuðum við á leikritið „Líkið í rauða bílnum“ og höfðum það bara náðugt. Um kl. 17 setti Þorvaldur lambalæri á grillið, uhm, sem var næstu tvo tíma að eldast. Við áttum von á mömmu og pabba í mat. Alls voru átta manns í mat og gerðu lambalærinu með tilbehör góð skil. Svo var ís, bláber og jarðaber í eftirrétt. Jarðaberin voru því miður ekki úr garðinum okkar en voru samt góð. Gummi fékk næstu tvö jarðaber úr uppskerunni og ég held að honum hafi líkað þau. Nú er bar um að gera að horfa á leikinn um 3. sætið í Copa America. 😉

Þarna má sjá jarðaberin mín öll að drífa sig að vaxa í sólinni, jibbí. :p
Unga parið á heimilinu, Edda og Gummi, eru að fara í smá ferðalag og ætla að hafa með sér tjald. Því var „kafað“ lengst inn í geymslu, það þarf svo sannarlega að kafa inn í geymsluna hér á Miðbrautinni því hún er undir stiga. Eftir að hafa fundið fram tjald og svefnpoka, var hafist handa við að tjalda. Byggingarverkfræðineminn Edda var fremst í flokki og var fljót að finna út hvernig ætti að gera þetta. Leikskólakennarinn mamma hennar fattaði nú samt hvernig átti að leggja lokahönd á verkið. Hér má sjá myndir af herlegheitunum.

Eftir að hafa lokið þessu, eldað og borðað héldum við hjónin í Kópavoginn til mömmu og pabba. Við ætluðum nefnilega að fá lánaðar sláttugræjur hjá gamla, hann á svo rosalegar góðar græjur sem við fáum stundum afnot af. Þegar heim var komið sló Þorvaldur en ég þreif híbýlinn, það veitti ekki af svo vægt sé til orða tekið. Nú er í raun kominn laugardagur, komið fram yfir miðnætti og allt orðið spikk og span. Á morgun og sunnudag ætlar tengdamamma að vera hjá okkur og vonandi verður gott veður svo að við getum bara verið úti. 😉