Nú höfum við stigið um borð í síðasta skipti og misstum því ekki af bátnum þannig að við ættum að komast heilu og höldnu til Miami á sunnudagsmorgunin. Við fórum á sýningu hjá innfæddum í dag, ótrúlega skemmtileg skrautsýning með tónlist og mexikóskum búningum. Pabbi var tekinn upp til að dansa við eina senjórítuna í sýningunni og stóð hann sig með stakri príði. Eftir sýninguna skoðuðum við mexikóska minjagripi og mín keypti sér poncho og sombreró, setjum kannski myndir af því við tækifæri. Á morgun verðum við bara á sjó og ferðin styttist óðum.

Hér kemur örlítil færsla bara til að láta vita af okkur. Dagurinn á Grand Cayman er búin að vera góður. Fórum í skoðunarferð um undirdjúpin og svo á fiðrildabúgarð. Mjög skemmtilegt hvort tveggja að allra mati. Við hjónin vorum að koma úr ræktinni og í kvöld er formlegur kvöldverður, svokallaður kvöldverður yfirkokksins. Nánar síðar 😉

Jæja nú erum við komin aftur á “Freedom of the Seas” eftir að hafa hrist af okkur ágenga jamæska sölumenn og leigubílstjóra sem ólmir vildu keyra okkur hvert sem er. Við héldum á tímabili að þeir ætluðu að slást um að þjónusta okkur en við ákváðum að láta þá bara eiga sig 😉 Við keyptum hawaiskyrtur, listaverk og eitthvað meira og prúttuðum jafnvel verðið niður, hér á Jamaica eru þeir í baráttu um túristana eins og á Haiti. Okkur fannst nú komið nóg, svo að við héldum bara til skips og fórum upp á Windjammer að næra okkur smávegis. Þar fengum við sæti við glugga og gátum setið og horft á umhverfið frá 11 dekki á skipinu. Við horfðum í gær á einhvern þátt í sjónvarpinu hér, þar sem sagt var frá eldhúsinu hér á skipinu. Þar kom fram að það er 140 tonn af mat notaður í ferðinni og í hvern kvöldmat í matsalnum þar sem þjónað er til borðs eru notaðir 10000 diskar og ekki vildi ég vaska upp fyrir fæðinu mínu hér 🙁 Og meira af einskis nýtum fróðleik svona til gamans, þá er Freedom 160000 tonn, fer á 21.6 hnúta hraða og er með 15 hæðir. Við erum á þeirri sjöttu með svalir sem virðast einhvern veginn alltaf snúa í rétta átt eða að höfninni og að landi þannig að við sitjum bara á svölunum og fylgjumst með þegar skipið siglir að og frá landi. Meðfylgjandi eru myndir af þessu fallega og tilkomumikla skipi 🙂 Næst þegar koma fréttir af okkur þá verðum við í banka paradísinni Cayman eyjum, þar til þá au revoir….