Seinni ferðadagurinn til San Francisco gekk vel þrátt fyrir snjó og hálku. Við hófum ferðina frá Best Western hótelinu í fjöllunum, við vorum aðeins að dunda í tölvunni og lögðum ekki á stað fyrr en kl. 11. Við ókum framhjá hinum þekkta stað Lake Tahoe og þar var allt á kafi í snjó og síðan héldum við í gegnum Carson skarð og þar leist okkur ekki á blikuna, við á sumardekkjum og snjóruðningstæki að störfum og krafa um að vera á keðjum eða með fjórhjóladrif. Ferðalagið gekk þó stórslysalaust og tveimur tímum síðar vorum við farin að keyra gegnum iðagræn vínræktarhéruð. Við tékkuðum okkur svo inn á Days Inn hótelið í San Bruno um kl.17. Undir kvöldmat skruppum við aðeins og kíktum í búðir og fengum okkur kvöldverð. Deginum í dag höfum við eytt í að ganga og keyra um miðborg San Francisco, meðal annars hið fræga Lombard stræti og ókum svo yfir Bay Bridge með viðkomu í Napadalnum. Eldsnemma í fyrramálið þurfum við að skila bílnum því við eigum flug til Seattle um kl. 10 😉

Hvað  er þetta og hvar er þetta? Þið vitið verðlaun fyrir alveg rétt svar 😉

Við leyfðum okkur að kúra aðeins lengur í morgun og lögðum ekki af stað fyrr en upp úr 9. Við vorum svo heppin að leið okkar skaraðist ekki við 100.000 áhorfendur að hinum árlega Nascar kappakstri  sem fram fer í Vegas. Við  ókum sem leið lá í dauða dalinn, Death Valley, þar sem getur að líta ótrúlega fegurð í landslagi eins og t.d. við Zabriskie Point og einnig ókum við þarna 100 fetum undir sjávarmáli. Við héldum svo áfram upp í fjöllin og fórum hæst í tæp 8.200 fet í Deadman og Conway skörðum. Þarna er  allt á kafi í snjó þó svo að göturnar séu auðar en allir þvervegir yfir Yosemite þjóðgarðinn eru lokaðir utan sveitaveg nr. 88 sem við ökum á morgun. Við erum núna á ágætu Best Western hóteli í smábæ sem heitir Topaz og er með gott netsamband.  Við erum komin aftur inn í Nevada og það var ekki að sökum að spyrja  þó svo að bærinn telji ekki nema svona 30 hús þá skartar hann 2 stórum hótelum og að sjálfsögðu spilavíti. Við eigum svo ekki eftir nema 4 og hálfan tíma í akstri til San Francisco svo við ættum að eiga léttari aksturs dag á morgun en við ókum rúmar 400 mílur í dag.