Hér koma myndir frá fyrri hluta halloween. Við fórum niður í miðbæ Pine Plains og fengum okkur morgunmat á Pine Plains Platter. Þegar við vorum að setjast niður eftir að hafa pantað matinn, sáum við leikskólabörnin koma í halarófu öll klædd í búningum. Gamla var ekki lengi að vippa sér út með myndavélina og taka nokkrar myndir. Þegar við vorum búin að borða og ræða við hjón sem búa í nágrenninu og buðu okkur að koma í kvöld og vera með í trick og tread, keyrðum við að brúnni frægu. Brúin fyrir þá sem ekki vita, hefur alltaf verið skreytt með 200 útskornum graskerjum en þar sem hún er að hruni komin verða því miður engin grasker ;( En það kemur ekki að sök þó það hefði verið gaman að skoða hana, því við höfum séð fullt að skreyttum görðum. Við enduðum svo á að skoða graskersbúgarð og þar sýna myndirnar meira en mörg orð. Meira síðar…….

Við lögðum af stað um hádegið eftir að hafa tékkað okkur út af hótelinu. Við ákváðum að keyra niður að Ground Zero sem við gerðum en komumst að því eftir að hafa keyrt í gegnum misspennandi hverfi að allt var lokað af og hvergi hægt leggja bíl til að skoða staðinn. Það var samt mikil breyting frá því að við vorum þarna síðast, ekki nein eyðilegging bara uppbygging. Það verður gaman að koma þarna seinna og vera þá ekki á bíl 😉 Við héldum áfram förinni í gegnum New Jersey alla leið upp til Woodbury Commons sem er outlet mall. Við nærðum okkur og gerðum smá viðskipti eins og okkur er einum lagið. Síðan keyrðum við eftir Taconic Parkway til Pine Plains og hittum Stan og Söruh. Það var gaman að sjá þau þó að það sé langt síðan síðast og ekki breytist mikið í sveitinni, jú það hafði bæst við einn hundur hún Esja. Við spjölluðum heil lengi og næst var haldið á veitingastað sem er í rauninni veitingaskóli og voru þjónar og kokkar allir nemar við skólann. Þetta er ótrúlega flottur staður í gömlum húsum sem einu sinni var klaustur. Maturinn bragðaðist frábærlega og eftirrétturinn geggjaður þrátt fyrir litinn. Í dag er ýmislegt á dagskránni, ætlum að skoða graskersbúgarð og fara með í trick and treat, vonandi verður þetta bara fjör 🙂

Í gær var sem sagt viðskiptadagurinn mikli, allt er hægt að gera á einum degi ef viljinn er fyrir hendi. Við fórum í þriðju stærstu verslunarmiðstöð hérna í New York, Roosewelt Fields. Mjög flott og er verið að stækka hana sem sést svolítið þegar inn er komið. Við eyddum þar dagsparti og sinntum okkar heimsþekktu viðskiptum 😉 Eftir að hafa klárað og nærst héldum við áfram förinni í nágrenninu og sinntum meiri viðskiptum. Það byrjaði að hellirigna á leiðinni heim á hótelið og gekk umferðin frekar hægt. Við komumst þó á leiðarenda heil á húfi og burðardýrið mikla hlóð á sig pokum og skellti sér inn á hótel án þess að blotna neitt rosalega mikið. Við eyddum svo kvöldinu við að gera nákvæmlega ekki neitt nema kannski að ganga frá varningi í töskur 🙂 Á eftir er svo ferðinni heitið til Pine Plains, með viðkomu í Woodbury Commons og er það ný leið fyrir okkur. Þar ætlum við að eyða tíma með vinum okkar Stan og Söruh og halda upp á halloween. Sarah ætlar að fara með gömlu í stærstu garnbúð í austurhluta USA og er það mikil tilhlökkun. Vonandi verða fleiri myndir í næstu færslum, ég hef átt í smá erfiðleikum að koma inn færslum en þetta hefst með góðri hjálp. Until later 😉