Nú er enn ein helgin liðin og komið að nýrri vinnuviku, ja hvað tíminn er fljótur að líða 🙂 Það hefur verið mikið að gera um þessa helgi hjá okkur, fyrir utan fasta liði eins og innkaup og þvotta, þá fórum við mæðgur tvisvar í ræktina í gær. Við fórum í „laugardagsfjör“ ótrúlega skemmtilegan danstíma og síðan hittum við þjálfara sem sýndi okkur tækjasalinn. Við getum nú farið að bæta við æfingaprógrammið og farið að sprikla í salnum og pumpað vöðvana í hinum ýmsu tækjum, bara skemmtilegt eða þannig 😉 Í dag fórum við svo með litla vinkonu okkar, hana Ísabellu í leikhús. Við sáum „Skilaboðaskjóðuna“ ótrúlega skemmtilegt leikverk bæði fyrir börn og fullorðna. Edda var að upplifa barnæskuna eða þannig, því hún sá þetta leikverk þegar hún var svona 7-8 ára og spilaði gat á segulbandsspóluna sem hún átti með leikritinu. Ég held hún hafi bara skemmt sér eins vel núna, ég gerði það alla vega og ég held að Ísabella hafi líka skemmt sér mjög vel. Alltaf gaman að fara í leikhús. Nú er bara rúm vika í ferðina okkar og ég skreið inn í geymslu eftir ferðatöskum í morgun um leið og ég tók svolítið til í geymslunni. Maður verður nú að fara að hugsa fyrir því hvað sett verður í þær, því eins og þeir vita sem lesa þessa vitleysu í mér hér á síðunni, þá hef ég þá leiðu tilhneigingu að pakka alltof miklu 🙁 En kannski verð ég bara skynsöm í þetta skiptið og pakka hæfilegu… en nóg með það, það styttist í háttatíma og ég er að hugsa um að hætta þessu að sinni. Þar til næst…
Gummi 24 ára
Hann Gummi hennar Eddu á afmæli í dag og er 24 ára. Til hamingju elsku Gummi og við syngjum fyrir hann „Hann á afmæli í dag, hann á afmæli í dag, hann á afmæli hann Gummi, hann á afmæli í dag“ kveðja frá okkur öllum á Miðbrautinni 😉
Í enda janúar
Jæja nú er janúar bara að verða búin og febrúar á næsta leiti. Þessi mánuður er búin að vera fljótur að líða að mínu mati en það er kannski bara vegna þess að ég hef haft svo mikið að gera. Við mæðgur erum búnar að vera geðveikt duglegar í ræktinni, mætum alla vega fimm sinnum í viku í átakið, salsa og ýmis konar aðra dansa, ótrúlega skemmtilegt bara 😉 Maður verður nú að líta vel út í Florida eftir tvær vikur. Það styttist alveg rosalega í ferðina góðu. Allt að smella saman, búið að panta bílaleigubíla og svona, þá á í raun bara eftir að pakka… Við höfum reyndar ekki fengið farseðlana yfir siglinguna en það kemur ekki að sök, núna tékkar maður sig bara inn á netinu góða 🙂 En nóg um utanlandsferðir, það styttist óðum í skemmtilegasta dag á árinu eða það finnst mér alla vega en það er öskudagur, öskudagur á leikskóla hvað er skemmtilegra? Þá fer maður í skrítna búninga og lætur eins og fífl í vinnunni eða þannig, í ár ætla ég að vera einhver svona prinsessa úr sjóræningjamyndinni „Pirates of the Caribbean“ en ekki hvað, bara skemmtilegt 🙂 En fyrst kemur nú bolludagurinn þó að við hrinjum nú ekki í bolluát á þessu heimili þetta árið 🙁 En ég er að hugsa um að hætta þessu pári núna og ætla að leggjast fyrir framan imbann og góna á eitthvað fyrir svefninn, eins og t.d. CSI Miami. Þar til næst…