Hér koma myndir sem við tókum í Atlanda 😉

Því miður höfum við verið á svo lélegu interneti síðustu daga að engar færslur og myndir hafa verið settar inn. En við erum búin að vera hér á Seralago hotels and suites í góðu yfirlæti þrátt fyrir arfaslakt internet. Við erum búin að nýta okkur þá sólargeisla sem gefast, liggja í sundlauginni og heita pottinum og bara slappa af. Við erum búin að fara í tvær skemmtilegar heimsóknir aðra til Beggu vinkonu og co í Ventura og hina til Chris Hurst og fjölskyldu í Safety Harbor. Í báðum heimsóknunum var stjanað við okkur og fengum við dýrindis máltíðir. Chris og Allen eru siglingarfélagar Siggu frænku og þau heimsóttu okkur á Íslandi í fyrra sumar. Þau fóru með okkur að skoða Safety Harbor sem er lítill fallegur bær rétt við Tampa. Þar var krítarhátíð og allar gangstéttir fullar af krítarlistaverkum og listamönnum á fjórum fótum við að klára verkin sín. Einstaklega skemmtilegt að heimsækja þau hjón og við hittum líka son þeirra, Pat og tengdadótturina Ashley 🙂 

Áður en við komum aftur til Orlando komum við við í Atlanta og gistum eina nótt. Þar sáum við það helsta í Atlanta eins og World of Coca Cola og Centennial Park. Við kíktum líka á Önnu Lovísu og strákana hennar og var mjög gaman að hitta þau. Keyrslan frá Atlanta til Orlando var frekar strembinn og við vorum virkilega glöð þegar við komumst hingað að lokum. Enn nú liggur fyrir að nota síðustu dagana í að sleikja sólina og slappa af og sinna pínu viðskiptum eins og gengur og gerist 😉 

Við áttum bara um 40 mínútna akstur frá Clarksville til Nashville og við nutum þess að keyra leiðina í sól og hita 😉 Dagurinn lofaði góðu sólarlega séð og hefur verið heitasti dagurinn til þessa í ferðinni. Við settum stefnuna á Grand Ole Opry og vorum komin þangað um kl. 11. Við keyptum okkur inn á skoðunarferð baksviðs sem tók klukkutíma og var vel þess virði. Við fengum að sjá hvar stjörnurnar koma inn, búningsklefana, baksviðs og svo studíó þar sem m.a. annars þátturinn Nashville er tekin. Við enduðum svo á sjálfu sviðinu í hringnum þar sem söngvararnir standa og syngja þegar þeir eru með sýningarnar sínar. Við hittum nú engan frægan í eigin persónu en það var mjög gaman að sjá myndirnar og heyra sögurnar af sögu Grand Ole Opry 🙂 Eftir að hafa skoðað svæðið vel héldum við á bílastæðið og sáum að þrír hvítir bílar með Flórídanúmer voru lagðir hlið við hlið og einn var okkar….. fyndið. Við héldum áfram ferðinni niður í miðbæ til að kíkja á hina einu sönnu Music City. Við lögðum við Bridgestone Arena en það er stærsta tónleikahöll á svæðinu. Við gengum svo niður í bæ og niður að ánni þar sem við tókum hop on hop off bus og fórum í hring um borgina og sáum það markverðasta. Eftir að hafa farið hringinn fórum við og fengum okkur í svanginn en héldum svo af stað í átt að Atlanta. Við lentum þó í hrikalegri umferða teppu á leið okkar út úr Nashville því við vorum á versta tíma á ferðinni. En allt hafðist þetta nú og erum við hér komin til Kimball þar sem við gistum á Comfort Inn eða ÞægindInn eins og við höfum þýtt það 😉