Category: Daglegt líf

Eins og segir í kvæðinu „Ég er hýr og ég er glöð, Þorvaldur er komin heim“ oj en væmið. Þorvaldur er sem sagt kominn heim frá Noregi, við mæðgur fórum undir kvöld í Keflavík að sækja hann. Gaman að sjá hvað flugvöllurinn okkar er orðinn alþjóðlegur, þar sem við stóðum og biðum þá stóðu fullt af fararstjórum og einhverjum með miða (eins og í útlöndum) en þeir voru að sækja farþega. Þeir stóðu í hálfgerðum hnapp og töluðu saman en þegar hurðin út úr tollinum opnaðist fóru hendur á loft. Ferlega gaman að fylgjast með þessu, allir rosalega skilyrtir eitthvað, hei þarna opnast hurðin upp með hendur. Við hefðum átt að standa í hrúgunni með spjald sem stóð á Þorvaldur eða Elkó, hefði verið ógeðslegur húmor en gott að vera vitur eftir á 🙂 Í dag var líka stóri læknadagurinn hjá mér eða þannig. Ég fór í morgun í blóðprufu, til að athuga með járnbúskapinn sem hefur verið í lágmarki síðustu misseri og svo fór ég líka í hjartalínurit. Hef verið að finna fyrir truflun á hjartslætti, spurning hvort konan sé bara stressuð haha… kemst að því í fríinu mínu sem er framundan. Seinni partinn fór ég svo í röntgen með puttann góða sem krambúleraðist í hjólaslysinu í júní. Hann hefur verið eitthvað skrítinn síðan og er ekki alveg að virka eins og hann á að gera. Ég fæ kannski bara þá niðurstöðu að ég sé lélegur sjúklingur, þ.e. að ekkert sé að mér, ég vona það a.m.k. En það var nú gott að það sé orðið fullmannað á Miðbrautinni, maður notar þetta orðatiltæki „fullmannað“ úr vinnunni, því það er nú ekki alltaf fullmannað þar en það er nú önnur saga 😉 Á morgun er svo kominn föstudagur og enn ein helgin, mér finnst í rauninni alltaf vera helgar sem er í sjálfu sér bara gott er það ekki… Um helgina ætlar svo tengdó að koma í heimsókn til okkar, svo við eldum nú örugglega eitthvað gott og borðum öll saman. En núna ætla ég að fara að hætta þessu í bili og þar til næst… ciao

Nú er helgin u.þ.b. að líða og ég sit hér og tala við Þorvald í gegnum Skypið, hann í Lilleström og ég á Miðbrautinni, samt er eins og hann siti hér við hliðina á mér. Eina er að hann er ekki með myndavélina á tölvunni svo ég sé hann ekki þessa stundina 🙁 En hann kemur aftur á fimmtudaginn. Það er 15° hiti núna klukkan 23.30 í Noregi en það var um 20° hiti í dag þegar þeir lentu félagarnir úr Elkó. Ég keyrði þá í Keflavíkina í dag, alltaf jafn gaman að koma í Keflavík… kvöldin þar þau eru engu lík… Í dag var fullt af fólki á rölti í miðbænum, verið að enda ljósanóttina og voða gaman að sjá þetta. Við mæðgur fórum í smá leiðangur í gær, guð hvað maður getur verið þreyttur á að fara í svona leiðangra, Ikea og fleira. Um kvöldið grilluðum við svo læri og allir borðuðu heima, svona fjölskylduboð voða gaman 😉 En núna er ég að spá í hætta þessu og hætta líka að tjatta við Þorvald í Norge. Við erum búin að vera að tala meðan ég pikka þetta inn. God nat 🙂

Ég var að koma frá henni Siddý í Permu en hún hefur það hlutverk að laga heysátuna á höfðinu á mér og er ég extra flott þessa stundina. Í dag voru strípurnar eiginlega klipptar burtu og viti menn þá komu gráu hárin í ljós, svei mér ef þeim fjölgar ekki jafnt og þétt. En svona er þetta nú maður eldist með hverjum deginum en þó er maður alltaf bara 29 eins og mamma gamla. Í gær fór ég svo í nudd til Stínu, hún tók vel á mér en það var langt síðan við hittumst síðast. Það var eins og hefði keyrt yfir mig trukkur í gærkveldi en dagurinn í dag er allur annar. Nú er kominn fimmtudagur og enn að koma helgi, Þorvaldur skreppur aðeins til Noregs á sunnudaginn og kemur aftur eftir nákvæmlega viku. Hann ætlar að fara að fræðast um heimilistæki og eitthvað annað skemmtilegt, syngja Elkjöp sönginn og svona. Við hin á heimilinu látum okkur leiðast á meðan… not, það verður bara fjör hjá okkur, vinna, skóli o.s.frv. Ég hef haldið áfram jafnt og þétt að lesa bókina hans Guðjóns og bregst hún ekki 🙂 mæli með henni. Enn nú ætla ég hins vegar að leggjast fyrir framan tv-ið og horfa á alla vega tvo uppáhalds þætti eða jafnvel þrjá. Svo næ ég nokkrum síðum í bókinni fyrir háttinn.