Vildi bara láta vita af mér svona, við mæðgur lifðum af fyrstu tímana í átakinu 😉 Á mánudaginn fórum við í viktun og mælingu en í dag var fyrsti tíminn í púlinu. Alveg ótrúlegt hvað maður hefur mikið úthald, áður en ég fór í tímann hélt að ég mundi ekki hafa þetta af og þyrfti bara að hvíla mig öðru hvoru. En gamla var bara í skratti góðu formi og þurfti bara ekkert að hvíla sig. Svo er spurning hvort hún geti hreyft sig á morgun fyrir hasperrum (veit ekki hvort þetta sé skrifað svona) og strengjum og þurfi að skríða í heita pottinn eftir vinnu en það er höfuðverkur morgundagsins 🙁 Outfit helgarinnar er næstum tilbúið, ég fékk ógeðslega bleikt belti og tösku í bling bling búðinni minni (Friis&company), þetta er svona lakkeitthvað var á útsölu, ég get trúað að þetta hafi verið á útsölu áður og jafnvel oft áður. Þrátt fyrir að þessi búð sé æðisleg að mínu mati, reyndar minn veikleiki (labba alltaf út með eitthvað, skrýtið…) þá voru þessir bleiku hlutir ekki alveg í anda hennar. Svo þarf ég að fá einn hlut í outfittið fyrir Þorvald, má ekki segja of mikið, þá erum við bara tilbúin í fjörið hjá henni Ólu (eins gott að það verði flogið) 🙂 Ég er að hugsa um að hætta þessu kjaftæði núna, but more later…..

Jæja nú er liðin vika af nýju ári og tími til komin að sinna áramótaheitunum. Ég hef nú ekki verið mikið fyrir að setja mér áramótaheit og hvað þá að reyna ná einhverjum sérstökum markmiðum 🙁 Enn núna í byrjun árs ákváðum við fjórir vinnufélagar, „þær fjóru fræknu“ eins og ég kýs að kalla okkur núna á þessari stundu, að fara á átaksnámskeið í nýopnaðri líkamsræktarstöð hér á Nesinu eða bara World Class. Þetta eru auk mín, mín ástkær dóttir, Sólfríð og Sigrún og mættum við í fyrsta tímann í kvöld. Eftir að hafa fengið möppu með fullt af upplýsingum, uppskriftum o.fl. og þjálfarinn okkar hún Bára hafði sagt okkur ýmislegt, var farið að vigta hópinn og mæla. Það var afar misjafnt hvernig fólk kom út úr þessum mælingum eins og gengur og gerist en þessi hópur er afar misjafn bæði í aldri sem og í vaxtarlagi en allir hafa held ég sömu markmið að styrkja sig og hafa gaman af 😉 Mér líst þrælvel á þetta allt saman stöðin er mjög glæsileg í alla staði og hópurinn er held ég góður. Ég verð reyndar bara með þeim í 5 vikur en námskeiðið stendur í 8. Það styttist nefnilega í afmælisferðina hans pabba gamla og er allt að verða tilbúið, einungis á eftir að panta bílana og gistingu í eina nótt. Við höldum af stað frá Íslandi 12. febrúar en ég á nú eftir að blogga svolítið um ferðina áður en haldið er í hann 🙂 Framundan núna er tvö stórafmæli annað er á fimmtudaginn en þá verður hún Sigga vinkona mín 50 ára, hlakka til að mæta í veislu til hennar og svo förum við hjónin til Eyja um helgina til hennar Ólu Heiðu sem er líka fimmtug. Við fljúgum út á laugardaginn og komum til baka á sunnudaginn. Við erum nefnilega svo góðu vön í siglingunum að við getum ekki verið þekkt fyrir að taka Herjólf 😉 Í veislunni hjá Ólu verður Grease þema en ég á nú alveg eftir að finna outfit á okkur hjónin. Það má því segja að nóg er að gera á næstunni, fullt af sprikli bæði í líkamsræktinni og svo í afmælunum. Læt þetta duga í bili 😉 Baráttukveðjur af Nesinu…

Gleðilegt ár og takk fyrir það gamla 😉 Það er til siðs hér á landi að gera upp gamla árið við áramót og ætla ég að gera það líka. Það má segja að árið hafi verið okkur hér á Miðbrautinni ánægjulegt þegar á heildina er litið. Ég skipti um starfsvettvang í maí, fór að vinna í Sólbrekku aftur og hef fundið að þar á ég heima (þangað til annað kemur í ljós eða þannig). Þorvaldur skipti um starf innan Elkó núna um áramótin, hætti sem deildarstjóri hvítu deildarinnar og tók við innkaupastjórastarfi og held ég að það leggist bara vel í hann. Við hjónin fórum í vel heppnaða síðbúna brúðkaupsferð í september, eyddum tíma í Orlando og náðum einni siglingu í Karíbahafið en þess má geta að siglingar eiga huga okkar þessa dagana. Við ætlum að skella okkur í eina slíka með gamla settinu á Hraunbrautinni í febrúar. Ég var á faraldsfæti á þessu ári, fór fyrst í maí ásamt Eddu og öllum hinum sem vinna í leikskólum Seltjarnarness að skoða leikskóla í Prag. Þetta var mjög skemmtileg, fróðleg og má segja vel heppnuð ferð í alla staði. Svo fórum við hjónin til Orlando í september og í nóvember fór ég ásamt henni Helgu Lottu fyrrverandi vinnufélaga og vinkonu til Boston og Chicago en þar fórum við á mjög skemmtilega og fróðlega ráðstefnu, NAYEC en það eru eins konar regnhlífasamtök kennara yngri deilda, þ.e. leik og grunnskóla út í henni stóru Ameríku. Afskaplega eftirminnileg ferð og ég býð eftir að komast aftur 🙂 Sumarið var afar sólríkt og við hjónin notuðum hjólhestana okkar mikið í að skoða nágrennið, hjóluðum um Stórreykjavíkursvæðið. Líkamsræktin hefur samt setið aðeins á hakanum ef tekið er meðaltal yfir árið en suma mánuði hefur verið tekið vel á. Þetta stendur nú allt til bóta á nýju ári enda hefur verið opnuð þessa fína líkamsræktastöð á Nesinu, svo aldrei er að vita nema konan skipti um stöð til að æfa kroppinn í 😉 Af börnunum er allt gott að frétta, Kristján er í vinnu hjá Orkuveitunni og unir hag sínum vel, hyggst á framhaldsnám í framtíðinni en ekkert er ákveðið enn. Edda vinnur í Sólbrekku og stendur sig með prýði. Hún ákvað á haustmánuðum að hætta í byggingarverkfræðinni og taka sér hvíld frá náminu, hún tók sér líka hvíld frá Elkó en hún hefur verið að vinna þar aðra hverja helgi. Hún hefur verið að velta framtíðarnámi fyrir sér og það kemur bara í ljós hvað verður fyrir valinu áður en langt um líður. Gummi er að klára Fjöltækniskólann og heldur áfram að læra meira ef ég þekki hann rétt en þetta á allt eftir að koma í ljós. Mamma og pabbi eru hress að vanda, hlakka mikið til ferðarinnar í febrúar og það má með sanni segja að ég vonast til að vera jafn hress og þau þegar ég kemst á þeirra aldur ef ég geri það yfir höfuð 😉 Tengdó er á Grund og er hjá okkur fjórðu hverju helgi, hún er mishress, stundum eitilhress og spilar hún þá með okkur í olsen, rommí og svona spilum. Stundum horfir hún með okkur á fótbolta í sjónvarpinu og drekkur súkkulaðikaffi sem er í miklu uppáhaldi. Við hin erum með hestaheilsu svona flesta daga, þó stundum hrjái okkur flensa eða aðrar umgangsbestir. En þegar á heildina er litið þá hefur árið 2007 verið okkur bara nokkuð gott og vonandi að 2008 verði það bara líka 🙂