Nú er helgin bara liðin, tíminn líður ógeðslega hratt svo ég noti nú svona orðalag eins og unglingarnir 😉 Í dag á Ásbjörn vinur fjölskyldunnar afmæli, hann er 16 ára í dag, til hamingju Ásbjörn. Hann eyddi miklum tíma hér á fyrstu árum ævinnar og var hann m.a. ákveðin að verða Kristján þegar hann yrði stór. En núna er Ásbjörn vinur okkar bara stærri en Kristján svo það er svona spurning um hvort æskudraumarnir rætast eða þannig. Þetta er nú stundum svona með æskudraumana, mig dreymdi m.a. um að verða flugfreyja eins og svo margar ungar stúlkur dreymdi um. En komst mjög fljótlega að því að ég gæti lagt þann draum á hilluna, var bara hreinlega ekki nógu stór og kannski heldur ekki alveg í réttum þyngdarflokki 🙁 En talandi um flugfreyjur, þá eru u.þ.b. 48 tímar í ferðina, þó svo ég sé ekki alveg farin að telja tímana. Ég komst nefnilega að því að ég væri of sein að panta vöru í Sagaboutique á netinu, ég þurfti að hafa fleiri en 72 tíma til að teljast pöntunarhæf en svona er þetta stundum bara. En heilsufarið á konunni er nú allt að koma, ég reyndar fékk eitthvað í bakið í gær en eftir að hafa legið á hitateppi megnið af helginni þá er þetta að koma. Hóstinn er á undanhaldi, svo allt lítur betur út 😉 Á morgun ætla ég svo að hitta hana Báru sem sér um átaksnámskeiðið og ætlar hún að vigta mig og mæla. Kannski fæ ég bara góðar fréttir um að ég sé á réttri leið með baráttuna við fitupúkann, svo er bara að vera duglegur að nota líkamsræktaraðstöðuna á „Freedom of the Seas“. Við fórum á Hraunbrautina í gærkvöldi, borðuðum með gamla settinu, kíktum á netið að skoða innviði skipsins og svo klippti ég pabba gamla. Ég hef séð um það undanfarið og var hann alveg að verða að hippa og þannig er nú ekki hægt að fara í afmælisferðina. Nú er spennan í hámarki en það styttist í brottför, svo að þetta er nú allt að koma 🙂 Það verður hægt að fylgjast með okkur hér á síðunni, við ætlum að reyna að vera þvílíkt dugleg að koma með færslur og myndir. Endilega verið dugleg að koma með ummæli og kveðjur, það er svo geðveikt gaman 😉 Þangað til næst….

Um það bil á þessum tíma fyrir 25 árum en klukkan er nú 00:47, vorum við hjónin að fara að sofa (ég hafði dottað í um 30 mínútur) þegar ég spratt upp úr rúminu og spurði Þorvald hvað hefði verið að gerast. Hann rauk út í glugga og vissi ekkert hvað ég væri að meina en ég hafði misst vatnið og þegar ég hafði áttað mig á því að ég stóð upprétt henti ég mér aftur upp í rúm. Ég mundi jú eftir því að þegar konur misstu legvatnið þá máttu þær ekki standa uppréttar, hvað maður gat nú verið barnalegur aðeins 19 ára gömul 🙁 Jæja en við fórum fljótlega upp á fæðingardeild og þar fæddist frumburðurinn einhverjum 13 tímum seinna, yndislega fallegur glókollur, sem heillaði alla með hvíta hárinu sinu. Enn s.s. hann Kristján minn er 25 ára í dag en hvað tíminn er fljótur að líða, mér finnst eins og þetta hafi gerst í gær eða þannig. Hann verður að fá afmælissöng í tilefni dagsins, svo hér kemur hann: „Hann á afmæli í dag, hann á afmæli í dag, hann á afmæli hann Kristján, hann á afmæli í dag“ 😉

Ótrúlegt hvað maður getur komist að skemmtilegum hlutum með því að vera vafra um internetið. Þannig er að ég er búin að liggja í rúminu í dag með einhverja veiki, flensu eða eitthvað annað veit ekki 🙁 Er búin að vera kvefuð í á þriðju viku, fór til læknis á föstudag í síðustu viku og fékk pensillín sem ég átti að taka eftir helgi ef ég yrði ekki betri. Á sunnudaginn gafst ég upp og leysti út lyfið og byrjaði að taka það. Síðan þá hef ég hóstað eins og berserkur nótt og nýtan dag og eru lungun farin að vera ansi aum. Svo núna undir kvöldið var mín bara komin með meiri hita, verð að losna við þetta fyrir ferðina sem hefst á þriðjudags eftirmiðdag, spurning um að hringja í Guðmund lækni humm… En hvað með það, var búin að liggja í allan dag og dorma, lesa smávegis og reyna að góna á imbann en fór að kíkja í tölvuna í leit af einhverju skemmtilegu. Og það sem mér finnst skemmtilegast að skoða eru auðvitað skemmtisiglingar 😉 Þar sem ég er að skoða einhverjar skoðanaferðir sem við getum farið í í ferðinni, dettur mér í hug að tékka á verðum á ferð eins og við erum að fara í. Og viti menn þá komst ég að því mér til mikillar gleði, að siglingin okkar sem við förum í 17. febrúar er núna á $4598 herbergið með öllu en við greiddum um $2300 og það var einungis eitt herbergi í boði á okkar hæð. Ég komst því að því að það borgar sig að skipuleggja svona ferðir snemma en ekki bíða fram á síðasta dag 🙂 Ef einhverjir eru áhugasamir um siglingar er hægt að hafa samband við ferðaskrifstofu Gróu sem er að verða sérfræðingur í þessu eftir allt bröltið á okkur eða þannig 😉